تحقيق حلم الامومه

السلام عليكم ورحمه الله وبركاته

*******************
اولا احب اهدى الموضوع ده لكل امرأه بتحلم انها تكون
أم فى يوم من الايام

وادعوا الله لى ولكل زوجه بأن يصلح الله لنا الاحوال

وان يرزقنا بالذريه الصالحه انشاء الله

*******************

انا انهارده هاكلمكم عن مشوارى من البدايه للنهايه
مع عمليات التلقيح الصناعى والحقن المجهرى

أولا :متابعه التبويض العاديه

ودى بتم كل شهر من بدايه اليوم التالت الدوره الشهريه

كنت بروح للطبيبه فى العياده وكانت بتابع معايا التبويض

وكنت باخد من اول يوم الدوره دواء عباره عن اقراص

اسمه كولوميد

ومن اليوم التاسع لحد ما تشوف حجم البويضه

كانت بتوصفلى بعض الحقن

مثل حقن الفوستيمون كنت باخد واحده كل يوم

لحد ما توصل للحجم الطلوب
وبعدها كنت باخد حقنه برجنيل علشان نخرج البويضه

واكنت بتطلب منى معاشره جوزى لمده 3 ايام متتاليه

والطريقه دى ممكن تستمر لمده طويله

ولما محصلش الحمل بالطريقه دى

فكرنا فى التلقيح الصناعى


ثانيا : التلقيح الصناعى

الطريقه دى جربتها 4 مرات وهى بتم فى مركز الخصوبه

اولا بيطلب الطبيب التحليل الازمه مثل صوره الدم

وتحاليل خاصه بالهرمونات النسائيه

وتحليل السائل المنوى للزوج

عملنا كل التحاليل اللازمه وكانت كلها سليمه

والحمدلله

بعها طلب الطبيب عمل اشاعه صبغه

وهى عمليه بتم فى اليوم الثانى عشر من الدوره تقريبا

وهى عباره عن صور اشاعه بتتاخد بعد حقن الصبغه

فى الرحم عن طريق المهبل

وطبعا العمليه دى مؤلمه جدا مؤلمه للغايه وكل واحده

ممكن تحس بالالم بطريقه مختفله

يعنى انا حسيت بألم بشع للغايه فى الجزء الاسفل من البطن

وكانت مشكلح دخول الحمام كارثه بكل المقاييس

لانى كنت بحس بالالم فى كل مره وده لان اعراض حقن الصبغه

اختلفت معايا وفى ستات اعرفهم كانت الاعراض غير كده خالص

وفى ناس عندهم حساسيه من الصبغه اساسا

المهم الطبيب حقنى بالصبغه وهى عباره عن حقنه

15 سم تقريبا بس حارقه للغايه وكان لازم تتحقن من غير بنج

ولما قولت للدكتور ليه من غير بنج قال

انى كل ما اتألمت كل ما كان احسن مش فاهمه ليه

المهم النتيجه طلعت بسرعه وكانت هايله مافيهاش اى حاجه

رحت للدكتور فى المركز المختص وقالى هانجرب ونعمل

التلقيح واخدت مجموعه من المنشطات منها الكلوميد

والفوستيمون والكوريمون وغيرها

واخدوا من جوزى عينعه السائل المنوى

وقاموا بحقنى بالسائل فى نفس اليوم
واعطونى مثبتات وفوليكاسد
وطلبوا منى استنى لما الدوره تتأخر عن ميعادها
واعمل التحليل لاختبار الحمل
ولما الدوره اتأخرت عملت التحليل فى اليوم 35 من الدوره

وهو اليوم 20 من التلقيح

ولكن الله لم يأذن بعد

وفى المره اللى بعدها طلب منى الدكتور عمل منظار

وعملت منظار على البطن والرحم

منظارالبطن بيتم مع البنج ومن 20 ل30 دقيقه فى غرفه العمليات

بعد المنظار حسيت بألام فظيعه جدا فى كل بطنى

لانهم اولا بيفتحوا فتحتين فى البطن بطول 1سم

واحده فى الصره مباشرا وواحده فى جانب البطن من الناحيه الشمال

وعملوا كمان منظار رحم علشان كده الالم كان لا يحتمل

وبعد المنظار خرجت الى غرفه خاصه فى المركز علشان افوق من البنج
وطلعت نتيجه المنظار فى وقتها برده هايله ومعنديش اى مشكله

بعدها خرجت من المركزوطلب الدكتور منى انى اروح فى اول يوم الدوره اللى بعدها

ورحت وكررت عمليه التلقيح 3 مرات كمان
ولم يأذن الله لنا

الحمدلله

بعدها قلت لجوزى انى عايزه اريح شويه لانى تعبت من المنشطات ووزنى زاد جدا ده غير الصداع والمزاج السيئ

وبعد فتره راحه شهرين فكرنا للحل الاخير

الحقن المجهرى

ثالثا : الحقن المجهرى

ودى بقى عمليه لها اسلوب خاص وبتحتاج لفلوس كتير

لان الادويه غاليه جدا وكلها عباره عن حقن

اولا بروح فى اليوم الخامس والعشرين من الدوره السابقه

وبعدين طلب منى الدكتور تحليل اسمه fsh واخر اسمه lh

علشان يشوف الاخبار ايه عندى

هرمون FSH هو الهرمون المنشط لحويصلات المبيضين

أو هرمون حث الجريبات(FSH)

وهو هرمون يفرز بواسطة الغدة النخاميه في الرأس و يتحكم في نمو البويضات و نشاط المبيض.


علشان معيار هرمون FSH في الدم له أهميه فائقة الدلاله

علي مدي إستجابة المبيض للهرمون حيث تزيد معدلات هرمون

FSH في حالة عدم إستجابة المبيض كمان تزداد معدلات

الهرمون زيادة فائقة مع إقتراب مرحلة إنقطاع الطمث

(سن اليأس)


FSH عادة يستخدم مع فحوصات أخرى زى

(LH التستوستيرون، الايستراديول، البروجسترون)
في المركز لكلا الرجل والمرأة

مستويات FSH مفيدة للتحقق من اضطرابات الدوره الشهريه

وهو يساعد على تشخيص الخلل النخامي(في الغدة النخامية)

ويشكف أيضآ عن البلوغ

أما في الرجال فإلهرمون ده FSH من الهرمونات التي تتحكم


في تكوين الحيوانات المنويه علشان كده أصبح قياس هذا

الهرمون أساسياً في حالة إنعدام الحيوانات المنويه للتعرف
علي مدي نشاط الغدة النخاميه.


وقد أجمعت هذه الدراسات على أن تحليل الـ FSH عندما يتعدى الأربعين يكون قد وصل المبيض إلى مرحلة الخمول؛ مما يترتب عليه انقطاع الدوره الشهريه
(أو ما يعرف عند العامة بسن اليأس).



أظهرت الدراسات أن نسبة هرمون الـ FSH عندما يتعدى

الـ 20 فإن المبيض يصل إلى حالة تقارب الخمول،

بمعنى أن بعض السيدات تستمر لديهن الدورة الشهرية

(منتظمة أو غير منتظمة) وفى كمان سيدات تنقطع الدورة الشهرية عندهم لمدة شهور،
ثم تعود ثم تنقطع، وهكذا لحد ما توصل نسبة التحليل
إلى قيمة أكثر من الأربعين

(حيث تنقطع الدورة نهائيًّا).

وكمان الهرمون ده له اهميه تانيه


إن البييضة لما بتخرج (أو تفقس) تحت ظروف خاصة،

بتكون تحت تأثيرات هرمونات جنسية خاصة،

ومن هذه الهرمونات هرمون الـ FSH الذي يساعد على تكوين البييضة
ووصولها في جرابها إلى حجم مناسب بين 22 مم – 26 مم،

لان فى حدودا فاصلة لإظهار قدرة المبيض على النشاط ونمو البييضات (ما يعرف بالخصوبة).

المهم


لما شاف التحليل

قالى ان الفرصه ضعيفه جدا بالنسبه ليا علشان سنى كبير

لان من سن 32 لحد 40 سنه

النسبه بتكون 25 % وطبعا علشان الحاحنا انا وجوزى
وافق الدكتور على عمل الحقن

اعطانى اولا الادويه المنشطه وهى كالتالى

decapeptyl ديكابيبتايل

ودى سعرها فى المركز 38 جنيه

وهى عباره عن حقنه 1 سم بيتاخد منها نص سم تحت الجلد فى البطن

زى الصوره دى بالظبط


مشوارى تحقيق الامومه


انا اخدت منها حوالى 14 حقنه بتتقسم على مرتين يعنى

28 شكه ابره

وممكن تتاخد كمان فى الذراع بعد كف اليد بشويه

والمكان ده احسن لانه المكان الوحيد اللى مش ممكن يتأثر بنسبه الدهون

لان الحقن دى عباره عن بروتين حيوانى

بيزود الوزن ويورم الجسم جدا وخصوصا القدمين انا لقيت

رجليا من تحت الركبه لحد صوابع رجلى مورمه جدا

لدرجه اى قلت انى عيانه او فيا حاجه غلط لحد ما دخلت على النت
وعرفت الاثار الجانبيه للهرمون ده

ومنها كمان واللى كان بيموتنى الصداع الشديد لرجه وصلت انى

كنت بخبط راسى فى اى حاجه قدامى وكنت كل شويه احط راسى تحت الميه المتلجه

علشان الصداع يخف شويه

لكن بعد اسبوع من بدايه الحقن دى بدأ الصداع يخف تدريجيا

والورم اللى فى رجلى برده كان بيخف تدريجيا

وكان الورم ده عباره عن سوائل زائده من الحقن

ده النوع الاول من الحقن

الانواع التانيه عباره عن

chorimon كوريومون

ودى سعرها فى المركز 24 جنيه

meonogon ميونوجون

ودى سعرها فى المركز 46.50 جنيه

وكنت باخد كيس فيه

واحده كوريومون واربعه ميونوجون

يعنى الكيس بيبقى فيه 5 حقن

وكنت باخد الخمس حقن دول كل يوم عضل لمده 28 يوم

مع الحقن اللى قبها اللى بتتاخد تحت الجلد

يعنى انا اخدت حوالى 140 حقنه عضل

ونص سم فى 24 تحت الجلد

احسبوهم كده يبقوا

164 حقنه ويا ريته جه بفايده
الحمدلله على كل شئ

المهم المفروض ان الهرمون اللى اتكلمت عنه يكون وصل لحد

3000 او 4000 لان الرقم ده هو اللى بيقول فى بويضات

ولا اكياس بويضات بس

لانها لو اكياس يبقى مش هانكمل وهنوقف كل حاجه

ولو التحليل ده طله اقل من 450 برده مش هانكمل

انا بقى بعد كل العذاب ده طلع عندى

550 يعنى ولا كده ولا كده

المهم الدكتور سألنا نكمل ولا ولأ

قلت لجوزى بعد كل ده لازم نكمل حتى لو كانت المخاطره كبيره

وحتى لو كنا هانشتغل ببويضه واحده

والله جوزى ماعترضش خالص ووافق على طول

المهم الدكتور طلب منى انى اخد كيس كمان من المنشطات دى
واروح ليه اليوم التالى

ورحت وانا صايمه علشان البنج لانى لازم اكون هاديه جدا

وكمان عمليه السحب بتكون مؤلمه جدا

المهم سحب البويضات واخد منى 3 وبعتهم للمعمل

علشان يتم حقنهم تحت المجهر بالحيوانات المنويه


مشوارى تحقيق الامومه
وقالى
استنى منى تليفون علشان نقولكم ميعاد الارجاع
وبعد 3 ايام


اتصل المركزبينا وقالنا ان البويضات انقسمت


مشوارى تحقيق الامومه



وطلب مننا اننا نورح للزرع

ورحت وزعت البويضا تحت البنج علشان الحركه والهدوء

لانى لازم اكون هاديه جدا جدا جدا

وكمان شاربه كميه مياه كبيره جدا علشان يعرف يشوف المكان اللى هايزرع فيه البويضات

وتم الزرع ونمت يومها فى المركز علشان الحركه بتاعت العربيه

ومن اول يوم للزرع بدأت اخد حقن اسمها

enophep اينوهب

ودى موجوده فى الصيدليات لكن مش كل الصيدليات

وسعرها من 16 : 20 جنيه

انا مش فاكره سعرها بالظبط لان فى منها تركيزات مختلفه

وانا مش فاكره التركيز اللى كنت بخده

والحقن دى علشان يبقى فى سيوله فى الدم

وكنت باخدها لحد يوم التحليل برده فى البطن

بس دى كانت 2 سم

وروحت تانى يوم وبقيت نايمه على ظهرى لمدد طويله

لحد اليوم ال 16 من الحقن ولما رحت عملت التحليل فى اليوم ده

وطلعت النتيجه سلبيه فوقفنا العلاج

الحمد لله على كل شئ
وبعدها قلت قدر الله وما شاء فعل

انا قلت اكتب الموضوع ده علشان اى عضوه لو كان عنها سؤال

تبقى عرفت من هنا لانى جربت كل ده

اما عن الاسعار

متابعه التبويض كانت ب 120 جنيه

اشاعه الصبغه 100 جنيه

المنظار 3500 جنيه

التلقيح الصناعى بادويته وتحاليله فى المره الواحده حوالى 700 جنيه

الحقن المجهرى بالكامل بالادويه والمركز والمعمل

كله على بعضه حوالى 13000 جنيه


ملحوظه اخيره

انا اللى كنت بحقن نفسى
عضل وبطن ويد

يعنى حقن العضل كنت بديها لنفسى امام المرايه

وحقن تحت الجلد كنت بجمد قلبى واخدها مره فى البطن

ومره فى الايد

وكان لازم اعمل كده لانى ماكناش ممكن حد يجى يدينى كل ده واطمنله

بصراحه صعب جدا

والمشكله ان جوزى كان بيخاف يدينى الحقن

مع انه دكتور

يالا الحمدلله

الحمد لله وقدر الله وماشاء فعل

اتمنى انى اكون عرفت اوصل المعلومات ليكم

بطريقه سهله وسريعه ولو فى اسئله تانيه

قولولى وانا هاجاوب عليها من خلال تجربتى الشخصيه

وادعوا الله لى ولكم بالرحمه والمغفره

اللهم انى استغفرك واتوب اليك







على فكره انا عايزه اقولكم انى كنت بحمل

من اول ما اتجوزت

وكنت بخلف وحملت 7 مرات ووصل الحمل للشهر
التامن وماكانش بيثبت

وكل المرات دى من غير اى تدخل طبي نهائى

وكان اخر مره حصل فيها حمل ليا وانا عندى 28 سنه

ومن وقتها وانا بحاول تانى





انها ارادتك يا الهى

اللهم الهمنى الصبر

والحمد لله على كل شئ