نصيحه لكل اللي قربوا يولدوا..خدوا بالكوا من ؟؟؟

السلام عليكم ورحمة الله وبركاته
ازيكم يا فتوكات .. عاملين ايه ..
انا هدخل في الموضوع على طول ..
ما تسعيش اوي للولاده طبيعي وسيبيها اللي ربنا كاتبه هيكون ..انا كنت هموت
واولد طبيعي .. وكنت بمشي كتير .. وكنت هاخد قرفه بس كل مره كنت اجي اخد
فيها كانت تحصل حاجه تنسيني اشربها سبحان الله والحمد لله ..والغريبه ان
جوزي قبل ما اولد كان مسافر ..وكنت متضايقه جدااااااا علشان انا عارفه ان
العلاقه الزوجيه ليها دور في الولاده الطبيعي .. وجه قبل ما اولد بيوم
وسبحان الله برده ما حصلش حاجه وكنت هتجنن .. وبعد كده حمدت ربنا ان محصلش
اي حاجه من اللي كنت عايزاها .. لانها لو كانت حصلت كان ممكن ابني يروح
مني لا قدر الله.. الحمد لله.. علشان كده بقولكوا خدوا بالكوا .. خدوا
بالكوا
لكل الفتوكات الحوامل اللي قربوا يولدوا واللي لسه جداد في الحمل .. اتاكدي من وضع الحبل السري على الجنين قبل الولاده ..
انا الحمد لله ربنا كرمني وولدت
شهر 7 .. ويوم الولاده كان ما يعلم بيه الا ربنا بسبب ان الحبل السري كان
ملفوف حوالين رقبة البيبي ومحدش كان عارف ..

اول ما رحت المستشفى ادوني محاليل
علشان يعملولي طلق صناعي .. وطبعا كانوا حاطين جهاز على بطني لنبضات
البيبي .. وفجأه بعد اقل من نص ساعه بدأ نبض الجنين يقل ويزيد .. ومتلخبط
اخر لخبطه .. وما كنتش عارفه هو ده طبيعي ولا ايه .. بس قلقت لما لقيت
الدكتور اللي عندي بقوا اتنين ووشهم مش مريح وبعد ما كان كل شويه يسألني
حاسه بأي حاجه واقوله لأ ما بقاش يسألني .. قلقت جدا .. المهم المفروض اني
كنت افضل عالجهاز ده والمحاليل حوالي 3 او4 ساعات لغاية ما الرحم يتفتح ..
فوجئت انهم اتلموا عليا فجأه اكتر من 3 ممرضات علشان يجهزوني للعمليات
والترولي طلع ياخدني ونزلت اولد في ثواني وطبعا ما حدش قالي في ايه وكنت
مرعوبه .. وبعد ما ولدت قالولي ان الحبل السري كان ملفوف حوالين رقبته
ولما البيبي ابتدى يستعد للولاده الحبل السري شد على رقبته .. وكان هيروح
مني ابني حبيبي.. وطبعا نزل اززززرق اوي وقعد في الحضانه حوالي 8 ساعات
بيدولوا اكسجين .. لغاية ما الحمد لله بقى كويس .. ولما سألت على سبب لف
الحبل السري قالولي علشان اكيد كنتي بتنامي على جنبك وفجأه تلفي على جنبك
التاني .. قلت ليهم اه كنت بعمل كده وانا فعلا كطنت بعمل كده كتير جدا
لاني ما كنتش بقدر افضل على جنب واحد كتير وخصوصا في اخر فترة الحمل ..
المهم .. قالولي لازم تقومي تتعدلي تقعدي شويه وبعدين تنامي على جنبك
التاني .. وطبعا انا ولدت قيصري .. ولو كنت سعيت اني اولد طبيعي كان ابني
راح مني لا قدر الله .. الحمد لله على كل شيء.. وربنا قوملي ابني الحمد
لله بالسلامه .. وربنا يحميلي ويخليلي ابني يوسف اللهم امين ويحميه (
اللهم اني اعيذه من اعين الانس وانفس الجن .. ومن كلماتك التامه من كل عين
وهامه ).. معلش طولت
عليكوا بس والله مش عايزه حد يحصل ليه اللي حصلي وربنا يقوم كل الفتوكات
بالسلامه ان شاء الله .. ويرزق كل مشتاقه اللهم امين ..